Penerapan Ham dan Polmas

OLEH : MUALLIM

Deungön bismillah lôn peuphôn Kalam
Allah Yang Rahman lôn seubôt nama
Alhamdullilah pujoe sanjôngan
Bandum pujian woe keu Rabbana

Seulaweut saleum akan janjôngan
Panghulèe Alam Saidil Ambiya
Yang peutrang donya ngön cahya Islam
Yang tanom iman di dalam dada

Rahmat sijahtra teuma ’oh lheuh nyan
Keu mandum taulan sidang pembaca
Ulôn kalön tan lôn turi pih han
Tapi lagèe sang saboh kandông ma

Keu pak polisi ngön ibuk Polwan
Saleum lôn layang bandum beu rata
Jaroe lôn beu-ôt bri penghormatan
Siaaap … komandan…lôn tabék sigra

Hajat lôn tuléh saboh khabaran
Lôn jôk keu rakan keu tanda mata
Meu kru seumangan rahmat bak Tuhan
Polmas deungön HAM lôn cuba rika

Donya ka akhé ka jeut tapandang
Buet keujahatan meurajalela
Meumacam bagoe dum keujadian
Haba bak koran kayém tabaca

Tadeungoe sinoe na penculikan
Idéh hai rakan ka jiperkosa
Na yang jirampok nyawong meulayang
Na yang ka mumang keunöng narkoba

Trôh bak aneukmiet ka jeut keu korban
Ka dipeudagang lagèe boneka
Aneuk sikula ramè tawuran
Meulhö bak jalan peuleumah teuga




Lam masyarakat pih cukôp sayang
Pelanggaran HAM syit ka biasa
Miseu keu contoh na pelecehan
Trôh kekerasan lam rumoh tangga

Bak pak polisi tan trôh laporan
Lagèe-lagèe sang kureung peucaya
Polisi ngön rakyat ji-ôh hubungan
Kureung dukungan keureuja sama

Meumacam bagoe geupeugah saran
Macam aturan kalheuh geupeuna
Tapi ‘oh ta-eu lam kenyataan
Buet keujahatan payah that reuda

Pihak polisi bahpih syit meunan
Hana tom bosan sabé usaha
Sabe geupeugöt pembaharuan
Langkah geurancang meubagoe cara

Peugöt seminar ngön penataran
Penelitian pih hana reuda
Pat yang na meutheun geukaji ulang
Yang kureung timang peutupat sigra

Ngön nanggroe luwa studi bandingang
Cok peungalaman cara keurija
Miseu keucontoh “KOBAN” di jeupang
Alèh peutra nan di Singapura

Di Amerika pih na teuladan
Penegakan HAM cukôp that nyata
Polisi-Masyarakat göt that ikatan
Peugöt keu rakan sibagoe mitra

Meunan keuh jinoe ka geuteurapkan
Geuchi peujalan di Indonesia
Ngön masyarakat peuköng ikatan
Peugöt keu rakan sibagoe mitra

Polisi Masyarakat teuma geubôhnan
Polmas singkatan mangat ta ija
Saboh filosofi kon hanya slogan
Kon keu piyasan keu gura-gura


Deungön na Polmas lam kebijakan
Rayek harapan trôh cita-cita
Harap beukeurung dum kejahatan
Dengön dukungan bak rakyat dumma

Tujuan Polmas wahé e rakan
Rayek harapan trôh cita-cita
Harap beu kurueng dum kejahatan
Deungön dukungan bak rakyat dumma

Dua komponen yang that geuteukan
Phôn kemitraan jinoe geubina
Polisi ngön rakyat beuna sejalan
Ceugah kejahatan keurija sama

Peuseuleusoe masalah teuma ’oh lheuh nyan
Hana sikhan-khan bak mat perkara
Dumma masalah wajéb peucahkan
Pakriban jalan pakat beusama

Teumpat meurumpok teuka pikiran
Geupeugot teuman Forum bersama
FKPM forum geubôh nan
Forum Kemitraan meunankeuh makna

Meubagoe unsur geugabông keunan
Keu perwakilan geucok anggota
AD/ART geutanda tangan
Ngat na aturan bèk ban nyang hawa

Geumusyawarah dalam forum nyan
Susôn rancangan langkah keurija
Sibuleun sigö peugöt lapôran
Mangat transparan saleng terbuka

Keu masyarakat geubri arahan
Ngön pendekatan yang bijaksana
Supaya meuphôm hukôm atôran
Bandum geupeutrang peugah beu nyata

Masalah ubit lam masyarakat
Ngön hukôm adat geuyue useuha
Jeut geupeuseluesoe bèk rôh aparat
Asai beuteupat bèk na nyang dawa

Masalah rayék bèk syit takarat
Teutap cok kiblat hukôm pidana
Bah geupeuseuleusoe uléh aparat
Geutanyoe rakyat hana kuasa

Keu masalah HAM geunyu horeumat
Bèk na lé rakyat yang teu-ilanya
Yang hana meuphôm geupetrang leugat
Teuntang hakikat hak manusia

Beuna tateupeu waha e taulan
Dum hamba Tuhan derajat sama
Hana meubeda putéh ngön hitam
Meunan syit taulan gasien ngön kaya

Bandum saban hak lam kehidupan
Na kebebasan hudép lam donya
Kasép geu-atô lam undang-undang
Bèk na hai rakan yang teu-ilanya

Wajib teulindông kelompok rentan
Kelompok rawan keunöng ilanya
Miseu aneuk miet umu belasan
Sabab aneuk nyan hana meudaya

Keu ureung inöng teuma ’oh lheuh nyan
Peureulèe lindungan bèk na nyang siksa
Meunan syit bagoe kawôm pendatang
Puerlèe lindungan tabri suwaka

Kelompok agama ngön kepercayaan
Group pergaulan yang dit anggota
Bandum awaknyan teulindung ngön HAM
Bèk barangkaban geutanyoe ceuca

Peutra kaitan Polmas deungön HAM
Le perkembangan takalon nyata
Polisi ngön rakyat ka köng ikatan
Penerapan HAM ka terlaksana

’Oh noe keuh dilèe haba lôn karang
Meu-’ah hai rakan meunyoe na gasa
Sigolom lôn tôp bacut lôn saran
Keu kebaikan tanyoe bersama

Beudöh rakan lôn inöng ngön agam
Sama berjuang tajaga bangsa
Keu pak polisi tabri bantuan
Sumbang pikéran dengön teunaga

Keu pak polisi bèk brôk dugaan
Bèk na hai rakan rasa curiga
Keurija sama peunténg tagalang
Ngat trôh tujuan aman tarasa

’Oh na masalah bagah lapôran
Bèk na teukambam teurahasia
Asai ka meubèe ngön keujahatan
Ceugah berijang bèk sampé raya

Dengan phatihah haba ulôn tôp
Jaroe lôn rahôp laju bak muka
Tamat riwayat bah that hana got
Lôn bôh lam amplop lôn jôk keu gata

Untuk syédara jaroe lôn beu-ôt
Lôn angkat salôt soe-soe nyang baca
Harap beu meu-’ah pat-pat yang na krôt
Bekna neucarôt upat ngön ceula