Hikayat Ham dan Polmas

Oleh : Sulaiman A. Manaf

Au’zubillah peujeuôh syaithan
Bèk na halangan sampoe bak hingga
Deungön bismillah nama Di Tuhan
Beureukat di sinan awai phôn punca

Salam a’laikum warahmatullah
Jaroe dua blah ateuh jeumala
Neusambôt saleum wajéb neupeugah
Meunan neusurah Rasul Ambia

Nyoe pat na bacut lôn ba hikayat
Kisah aparat alat neugara
Nyan maséng-maséng tugah ka meupat
Keu damai rakyat mandum geujaga

Jinoe lôn kisah keu bapak Polri
Bapak polisi atawa bhayangkara
Polisi inöng ngön bhayangkari
Mangat taturi nyan Polwan nama

Wahé bangsalôn inöng ngön agam
Keu ibu Polwan sama tajaga
Tugah di gopnyan le macam ragam
Ngön Polri agam tugah tan bèda

Meunyoe neulèwat bak jalan-jalan
Di ibu Polwan na sajan gata
Beuhati-hati wahé e rakan
Tugah di Polwan that bijaksana

Ci cuba bayang meunyoe gopnyan tan
Teuntèe bak jalan karu sabéna
Tapi pakon cit wahé e tolan
Keu Ibu Polwan kureung tanitna

Wahé rakan lôn nyang na di gampông
Bah that di dusôn atawa kota
Keureuja di gobnyan sama tadukông
Supaya hukôm mangat meurata



Bukön lawét nyoe ban teuka Polwan
Nyankeuh hai rakan nam plôh thôn ka na
Neucuba baca dalam seujarah
Meunyoe tan salah thôn peut lapan ka na

Hudép geutanyoe lam dônya Tuhan
Le that hai rakan masalah teuka
Bapak Polisi sibôk urusan
Keu handai taulan nyang ba peukara

Tapeubut surôh peuji-ôh teugah
Nyang larang Allah bèk takeureuja
Tulông-meunulông bak buet nyang ceudah
Bak buet nyang salah bèk na rôh gata

Kadang hai ummi tanyoe tan salah
Geubeudoh ayah droeneuh geutampa
Neubeudoh laju hai ummi meutuah
Neumusyawarah ngön ureueng tuha

‘Oh neuduek pakat bèk na neubantah
Soe nyang tan salah cit na soe bèla
Peu lom lawét nyoe di peumeurintah
Ka lheuh geupeusah ureueng tung bèla

Na lom calitra keu aneuek gadöh
Cit leupah seudéh dalam beurita
Dijanji meunoe dirayu meudéh
Buet cukong paléh ditipu daya

Bak dimeujanji na buet di sidéh
Di aneuk gadöh hana brôk sangka
Meuban diteupeu peu buet di sidéh
Di sinan habéh dirô ie mata

Watèe dijak badan jih sidroe
‘Oh jiwoe dudoe ka badan dua
Ingat hai waréh bèk tuwoe-tuwoe
Peusan kamoe nyoe bèk sampoe lupa

Wahé adoe lôn putra ngön putri
Lagèe nyan dali jameun kon kana
Tapi lawét nyoe ka laén versi
Hai aneuek putri beutegöh raya



Beuna peu ingat wahé e ayah
Bèk sampoe teulah ‘oh ka teujadi
Calitra ummi ka lhueh lôn peugah
Keu dara ceudah pih ka lôn rawi

Jinoe lôn peugah bak mandum kaum
Kuta ngön dusôn hukôm HAM kana
Bèk na nyang ragu deugön nyan hukôm
Tapi beu meuphôm beu meuho makna

Makna dari HAM jeut lôn peuteupat
Dengön beugèt that wahé syédara
Makna lôn atô meunurôt tingkat
Nyan hak asasi keu manusia

Meusoe meulanggar deungön hukôm nyan
Keunöng hukôman tamöng peunjara
Meunurôt prinsip beutôi atra nyan
Supaya aman dum manusia

Neucikeu buka lam undang-undang
Pasai dua lapan dalam ayat sa
Di sinan na hak untuk geularang
Bèk na kekerasan keu manusia

Jinoe lôn seubut bacut keu contoh
H’ana geubri poh si manusia
Hak untuk udép pih jeut keu contoh
Neujaga beu jroh wahé syédara

Neuci buka lom Undang-Undang HAM
Di sinan neupham meuribèe makna
Neunging artian lam pasai DUHAM
Dalam pasai nyan pih dumpeu ka na

Trôh warna kulét jenis keulamin
Beu-ék neujamin bèk neupeubèda
Peukeuh jih kaya atawa gasin
Nyan pih neujamin hakjih beu sama

Gèt that meukayét Polri deungön HAM
Bah nyang agam atawa wanita
Lagèe korupsi dan laén macam
Na peurampokan dan pemerkosa


Meunyoe tan Polri dalam bidang nyan
Soe cit hai rakan nyang tulông gata
Soe-soe meulanggar ngön asasi nyan
Polisi sinan nyang plöh peukara

Kareuna masalah le macam ragam
Sampoe urusan lam rumoh tangga
Di KDRT ka saboh macam
Nyankeuh kekerasan lam rumoh tangga

Inöng ngön lakoe bèk sabé meuprang
Bèk teungoh dibang sibôk lam dakwa
Beuna ta piké wahé e cut bang
Menyoe jadèh prang rugoe that raya

Kadang di rumoh na babu malang
Tip uroe Tuhan keunöng seurapa
Lèh pakön meunan akai juragan
Hana pikiran ban manusia

Na cit keu inöng kureung geupakoe
Di agam laloe sibôk di luwa
‘Oh watèe geujak hana geuwoe-woe
Di aneuek keudroe inöng peulara

Nyan lôn kisah nyan keu contoh rakan
Nyan kekerasan lam rumoh tangga
Meunyoe na mak wa lagèe nyan macam
Bèk seugan-seugan neuba peukara

‘Oh lheuh nibak nyan bacut lôn sambông
Keuamanan gampông beu-ék tajaga
Jinoe ka na Polmas lam gampông
Teumpat meulindông wahé syédara

Peu arti Polmas bah tapeuteupat
Mangat neu-ingat peu arti nama
Perpolisian deungön POL nama geusingkat
Masyarakat MAS geusingkat nama

Deungön Polmas nyoe le that meutulông
Rakyat lam gampông ka na soe bèla
Bah pih na FKPM di dalam gampông
Wahé rakan lôn bèk sabé dakwa


Kemitraan phôn hubungan Polri
Mangat taturi keureuja nyan sama
Menyoe permanen deungön proaktif
Keuamanan pih tertib teurasa

Wahé syédara nyang na di gampông
Bèk di dusôn atawa di kota
Meunyoe na teupèh atawa teusinggông
Bak payông hukôm peukara neuba

Meunyoe na Polri geujak peulindông
Dijak meulindông miras narkoba
Neulapor laju ubak pimpinan
Di oknum nyan teutap geusiksa

Takoh bak u keu tietie peukan
Takoh bak asan keu tumpang jalô
Tadukông Polri untuk keuamanan
Bèk na soe padan peumeu-‘èn calô

Dari rakyat geuwoe keu rakyat
Untuk meusapat ’oh dudoe teuma
Polri di gobnyan atawa aparat
Beujeut keu ubat ’oh wo u dèsa

Malam ka jula mata ka layèe (malam)
Lôn singkat watèe hikayat lôn ba
Uroe ka jula mata ka kunang (siang)
Lôn singkat ’oh nan hikayat lôn ba

Dari awai phôn ’oh han keu dilèe
Meu’ah teulakèe wahé syédara

Teuma sigoe treuk ulôn ucapkan
Ucap seulamat beu meubahgia
Namplôh thôn umu geubri lé Tuhan
Mudah-mudahan Polwan beu jaya

Panitia pih kamoe h’an tuwoe
Lam acara nyoe phôn-phôn geupeuna
Meunyoe na umue geubrie lé Tuhan
Thôn akan datang geuriwang teuma

Wassalam