Tabangun Aceh Dengon Polmas dan Ham

Oleh : Aris Munandar

Salamu’alaikôm kawôm meutuah
Jaroe dua blah ateuh jeumala
Neusambôt saleuem lôn bapak meutuah
Neusambôt bagah ngön haté suka

Leupah that sayang bintang peureuséh
Ta-eu cut bang jéh halôh ngön gasa
Beunoe takaleueng jinoe ta tindéh
Beunoe tatuléh jinoe tabaca

Alhamdullilah pujoe keu Tuhan
Po makhluk alam langèt ngön dônya
Peuneujeut geutanyoe dum seukalian
Keu khalifahan hudép lam dônya

Seulaweuet saleuem ateuh janjôngan
Pangulèe alam Rasul Ambia
Peuteunyok geutanyoe dari kegelapan
Hingga ban trang ta kalön nyata

Ta’zim hormat ulôn layangkan
Bacut lôn paban keu panitia
Keu Bapak Kapolda ulôn hormatkan
Keu bandum rakan para anggèeta

Na nyang hi Mithun Amin Tabachan
Na nyang Syahrulkan na nyang Govinda
Peulom takalön Bapak Rismawan ngön istri teusayang
Sang-sang Hitrik Roshan ngön Pretty Shinta

Keu dèwan juri ulôn haturkan
Cukôp that garang bak geubôh angka
Tan na geupakèk handai dan taulan
Nibak peunilaian saban geukira

Tanggai sa September dua reubèe lapan
Saban tapandang ngön haté suka
Saboh acara keu peuringatan
Ulang Tahun Polwan nyan geubôh nama

Deungön acara ulang tahun Polwan
Tajaga hai rakan marwah di gata
Meunyo na anggota nyang pubuet keusalahan
Laju neusidang hai pak Kapolda

Meukru seumangat rahmat bak Tuhan
Lôn susôn nazam sastra budaya
Seureuta Polmas seurueta ngön HAM
Peulindông insan hudép lam dônya

Amma ba’du laju’oh lheuh nyan
Lôn mula nadham ngön haté suka
Berpartisipasi ikôt perlombaan
Keu Polmas dan HAM ulôn calitra

Maklumlah ulôn mula-mulaan
Nibak tulésan han tom biasa
Peumeu’ah ulôn handai ngön taulan
Jinoe hai rakan nazam tamula

Tanyoe bersatu beu sapeu pakat
Peujabat ngön rakyat saban seujahtera
Bahô-meubahô beu akur that-that
Deungön aparat polisi teuntra

Aceh tabangun bèk meutheun sapat
Beumakmu rakyat adé beurata
Ngön perdamaian kaleuh teuikat
Meubèk lé cacat si umu masa

Nyang cikok-cikok beu tapeuteupat
Nyang batat–batat beugöt tabina
Ureueng nyang salah tabi nasèhat
Bèk tan meupeuwab langsông tatampa

Bèk peugèt hakim tan meupat sapat
Jaga beugèt that hak asasi manusia
Nyang akai jeuheut bacut deeungön brat
Ka teuntèe teumpat dalam peunjara



Peulom nyoe jinoe tanyoe hai sobat
Polisi masyarakat ka na dum rata
Nyang na masalah langsông peuteupat
Han lé meukarat dalam sengketa

Hukôm beu teugak lagèe lam surat
Lam masyarakat hana lé subra
Menyoe teujadi pancuri kaplat
‘Oh lheuh tatangkap jôk bak nyang kuasa

Kana polisi teuliti teupat
Ngön masyarakat saléng keurija
Menyoe geutanyoe ka sapeu pakat
Lôn yakin that-that aman seujahtera

Tugah polisi aseuli jroh that
Lam masyarakat hana geubèda
Meuyoe na informasi dari masyarakat
Langsông u teumpat nibak peukara

Bèk hukôm rimba taba lam gampông
Beu na tajunjông dum hak asasi
Hak udep ureung wajéb teulindông
Na dalam hukôm ureung Islami

Meuteumeu pancuri bèk neupoh langsông
Seubab rakan lôn gadoh barang bukti
Paréksa dilèe jamèe tasatoh
Keudèh ta-urôh nibak polisi

Na yang keunöng hukuman pancông
Teuma yang ladôm meurumpok rémisi
Na nyang geutimbak bak teumpat langsông
Di sinankeuh hukôm nyang meularikan diri

Tugah polisi aseuli lôn salôt
Darat ngön laôt geujaga habéh
Peulindông rakyat beungoh ngön seupôt
Cukôp that patôt geutanyoe gaséh

Walau pakiban pantang geuseurôt
Hana geutakôt dak nyawong habéh
Meunyoe na nyang jeuheut nyang peuget ribôt
Langsông geu-angkôt u kantô blahdéh


Rakyat beu aman beuseunang cukôp
Bèk di peutakôt ‘oh watèe geu-éh
Maka seubab nyan hai abang Akop
Keu polisi patôt teurimong gaséh


Polisi ngön rakyat lagèe ie ngön eungkot
Na sangkôt pawôt gaséh-meugaséh
Nyankeuh jeut maka muka meubèk krôt
Lam leumoh leumbôt bèk na seuliséh


Alhamdulillah nazam ulôn tôp
Ngön leumoh leumbôt kaleuh lôn tuléh
Patna nadham kadang na karôt
Jaroe lôn beu-ôt meu’ah lôn waréh

Haba lôn piyôh ratôh lôn seutôp
Ulôn peucukôp wahé e waréh
Lôn lakèe meu’ah kadang rôh meudhôt
Bèk na sangkôt pawôt lam haté meugréh

Deungön wabillah nadham ulôn tôp
Jaroe tabeu-ôt meudo’a keudéh
Seumoga polisi beungoh ngön supôt
Ubé na buet krôt beu-ék geupeugléh

Ngön tulông Allah leupah meupawôt
Beungoh ngön supôt Acèh beu beurséh
Beuteudöng hukôm adé ngön patôt
Acèh nyang leumbôt lindungan Kkhaléq