Polmas Lam Gampong

oleh: Zulmahrita

Alhamdulillah rahmat meuhimpôn
Seulaweut sijahtra lôn ubak Saidina
Lôn cuba-cuba ulôn ci susôn
Syair ngön pantôn pusaka lama

Teuma uroe nyoe ka meuri rihôn
Syair ngön pantôn ka ramèe teuma
Diteuka galak ureueng lam gampông
Seubab hai kawôm h’an tom biasa

Jinoe pih ka trôh bungkôh u keu lôn
Lôn cok lôn seu-ôn ateuh jeumala
Di lôn cit sabé haté lôn rihôn
Syair ngön pantôn galak lôn baca

’Oh no sikada punca narit lôn
Ranub keunèng ôn puan suasa
Saleuem ta’zém sambôtan bak lôn
Geunantoe pawôn lôn lhat bak dada

’Oh musém timu geulabôh pukat
’Oh musém barat geulumbang raya
Nyoe pat hai waréh kawôm ngön sahbat
Saboh hikayat ulôn calitra

Indonesia nanggroe berdaulat
Hukôm ngön adat adé meurata
Rakyat bersatu timu ngön barat
Rata jeut teumpat takalön rupa

Lôn peugah jinoe Polmas masyarakat
Polisi masyarakat ulôn calitra
Bapak polisi cit mitra rakyat
Ureueng nyan meuhat lindông negara

Ureueng nyang teugak hukôm nyang bijak
Malém ngön bangsat dum manusia
Tan pandang bulèe bandum geusidak
Phui deungön brat geuhukôm sama



Geutanyoe rakyat tabri seumangat
Untuk aparat polisi negara
Supaya mudah hubungan mangat
Informasi rakyat peureulèe raya

Nyang hana beutôi laporan le that
Mangat geusergap geujak drob teuma
Peu-ék bak hukôm langsông geujeurat
Geupeuduek teumpat dalam peunjara

Dirasa keudroe nyang peubut jahat
Nyang peubut laknat ateuh rhung dônya
Dalam peunjara geukeubah teumpat
Bantai bak langsat ngön si ôn tika

Di langèt manyang bintang meuriti
Di binèh pasi meutabu anoe
Buku lôn balék mangat got bunyi
Awai maté i dudoe maté oe

Lôn peugah jinoe keu pak polisi
Mangat neuturi wahé teungku droe

Kapolda Aceh instruksi geubri
Keu rakyat neugri di dalam nanggroe
Bandum geuhimbau putra ngön putri
Tuha ngön tuhi adun ngön adoe

Rakyat lam gampông beu hati-hati
Beu na teuliti sabé tiep uroe
Beu na keamanan lam gampông neubri
Bèkna teujadi peukara nanggroe

Kamtibmas beuna rata jeut seugi
Malam ngön uroe yu jaga sagoe
Bèk tabri keuseumpatan keu ureueng deungki
Peurampok pancuri bandum tareungkhoe

Rakyat geulindông keamanan geubri
Jasa polisi cukôp göt budoe

Dua plôh peut jeum layanan geubri
Kantô polisi teuhah tiep uroe
Bèk na teumakôt laporan neubri
Asai beutôi hi geutanyoe bèk yoe

Di dalam gampông tanyoe bèk sangsi
Nye na pancuri bèk tadrop keudroe
Bagah neulapor u bak polisi
Ingat hai akhi bèk tahakim keudroe

‘Oh teuleuh neudrop jaroe neugari
U kantô polisi neuintat keudroe
Bèk neupoh maté h’an jeut cok bukti
Kadang pancuri dijih kön sidroe

Meunyoe ka tapoh tan lé bukeuti
Watèe takaji geutanyoe rugoe
Bandum peukara h’ana areuti
Menyoe ka maté soe lom tapeugoe

Nyankeuh peureulèe polmas neuturi
Untuk awasi bagi geutanyoe
Polmas lam gampông cukôp beurarti
Untuk atasi si beuranggasoe

Supaya gampông aman h’an sakri
Hana pancuri hana peungaco
Di dalam gampông tabina santri
Pemuda pemudi tajaga keudroe

Beu na persatuan organisasi
Bidang meungaji wajéb meureunoe
Beu na olahraga sèhat jasmani
Kaum lelaki ngön kaum binoe

Nyangkeuh bah Polmas peureulèe peuhah
Masyarakat polisi mitra geutanyoe
’Oh noekeuh bak droe keu Polri peugah
Siaran lôn bahaih dalam buku nyoe

Amin ya Allah amin ya Rabbi
Nèkmat beu neubri bandum keu kamoe
Neubri Aceh nyoe wahé Illahi
Aceh madani harapan kamoe

Deungön wassalam saleum ulôn bri
Pujoe ngön puji keu Tuhan sidroe