Hikayat Penerapan Polmas Dan Ham

OLEH : T. MUKHLIS


Kalam Iftitah

Deungön bismillah lôn peuphôn kalam
Lôn lakèe ampôn sigala désya
Bak Tuhan sidroe nyang peujeuet alam
Bèk na meukumat akhérat dônya

Sigala pujoe puwoe bak Allah
Alhamdulillah Rabbul’Izzati
Geupeujeuet bumoe ngön nanggroe lé Allah
Tamita raseuki menurôt tuntutan Ilahi Rabbi

Allah geupeujeut syeuruga ngön nuraka
Lheuh nyan gepeubèda uroe ngön malam
Beuna tapiké gepeubèda uroe ngön malam
Beuna tapiké wahé syédara
Tuha muda inöng ngön agam

’Oh lheuh tapujoe Allah Rabbana
Seulaweut tabaca ateuh Rasulullah
Ka geujanji lé Allah akan pahla
Tajunjông Nabi beuleupah-leupah

Teuma bèk tuwoe keu bandum keuluarga
’Oh lheuh nyan meuh’at keu para sahbat
Nyang ka meusunggôh-sunggôh bèla agama
Geumeuprang kaphé nyang leupah that-that

Saleum ta-atô teuma keu gurèe
Nyang ka geubri ileumèe di dalam dada
Ayah ngön ma tado’a sabé
Beuna tajaga ‘oh watèe tuha

Lôn peu-ék saleum keu kawôn dumma
Timu ngön barat nyang ka meusapat
Nyang ka hadir dalam acara
Nyang jiôh tajak keunoe banja tapeurapat

Assalamu’alaikom lôn tuan ucapkan
Jaroe dua blah ateuh jeumala
Ubéna désya nyang na sajan
Peujiôh sigra ngat seulamat sijahtra
Bukön lé sayang po bungöng mirah
Ka habéh durôh reubah u dalam kulam
Na saboh hajat lôntuan kisah
Teuntang peulisi masyarakat ngön HAM

Bukön lé sayang hai po bungöng mancang
Dalam keunarang ka durôh keudroe
Nyoe keuh phôn ulôn keumarang
Rata kitab ileumèe lôn meurunoe

II
HAM ngön Peulisi Masyarakat

Ô ya Tuhanku jinoe ka meugah teuntang HAM
Rata sagoe disosialisasi hak asasi manusia
lé donya, peumerintah, atawa aktivis LSM
Beu sapeu pakat tajaga hak ureung bèk sampoe di-ilanya

Dalam DUHAM thôn 1948 geupeugah
Tip-tip ureueng na hak ngön kebèbasan
Hana bèda agam inöng kulét itam atawa putéh
Baék bahasa maupun agama teutap na hak saban

Teuma di Indonesia HAM na syit seujarah
Sigohlom thôn 1600 watèe nyan bak masa keurajaan
Bhineka tunggal Ika jeut keu simbôljih
Lheuh nyan ta kalön bak masa prakemerdekaan

28 Oktober 1928 bak Sumpah Pemuda
Aneuk-aneuk muda meupakat untuk peubèla hak
Watèe proklamasi meugah that ngön Pancasila
Dalam UUD 1945 pih ka atô teuntang hak-hak

Sampoe’an jinoe le that undang-undang
Atôran nyan hai teungku bèk talangga
Hak asasi gop beuna tapandang
Sesuai pula ngön ajaran agama

Mandum ureung beu muphôm teuntang HAM
Khusus lom keu aparat-aparat nanggroe
Peulisi, teuntra, jaksa, atawa hakim
Ngat bèk salah bak cok keputusan ngön hukôm

Teuma leubèh meuh’at lom keu pak peulisi
Karna awak nyan sabè lam masyarakat
Jadi na atôran ketentuan prilaku keu peulisi
Geupeunan code of conduct

Tip-tip peulisi beuna sikap profesionalisme
Na peut boh indikator sikap profesionalisme nyan
Beuna kompeten dalam ileumèe
Lheuh nyan na keterkaitan ileumèe ngön keutrampilan

Peulisi pih beukonsisten ngön beuna komitmen
Beusaboh pakat but ngön haba
Meunyoe peut boh nyan ka jalan
Hana bantahan hai teungku wibawa akan teupeulihara

Jinoe hai polém bèk tatakôt lé
Peulisi nyan peulindông masyarakat
Polém jak uruh surat hana masalah lé
Leupah that meunyum peulisi geulayani masyarakat

Tip-tip buet peulisi kana asas-asas
Na lhèe boh asas nyang jeut peudoman
Legalitas phôn nesesitas dua keu lhee proporsionalitas
Lhèe boh nyan pih jeut keu dasar peuglöng hukôm

Meunyoe gata hai polém jidrop lé peulisi
Polém ka tahe hana peu seubab
Meunyoe meunan hai polém neulakèe bukti
Surat penahanan atawa surat geuleudah

Teungku peulisi harôh na mandat
H’an jeut drop ureung keu galak-galak
Karna legalitas peulisi na lengkap surat
Meunan geuatô lam undang undang internasional

Lheuh nyan hai polém peulisi na prinsip nesesitas
Peulisi jeut geucok tindakan bèk mudharat ureung
Miseue na bandét ji pakek bôm molotov
Geujak peuancô saré dum ureung

Nyan peulisi jeut meu’en timbak
Timbak bak jaroe timbak bak gaki
Tapi bèk timbak keu galak-galak
Supaya bandét jeut dilumpuhkan ngon dikuasai

Prinsip proporsionalitas jeut saboh tindakan
Peulisi harus jaga droe ngön masyarakat
Bèk keumah ngön cilaka sabab lalèe bak peutheun
Kalön keudaan kiban nyang mungkén ta peuteupat

Namun demikian cok beudé bèk seumbarangan
Timbak gop atawa bandét hanya lam keudaan luar biasa
Jeut cit keu peumeuklèh droe nibak maw’et
Lheuh nyan taceugah bèk sampoe na karue lé peulaga

Beudé nyang tatimbak beuna prosedur
Aparat harôh kheun droe bahwa jih peulisi
Bi peuringatan deungon jelas dan lancar
Lheuh nyan taceugah bèk sampoe karue

Beudé nyang ta timbak beuna prosedur
Aparat harôh kheun droe bahwa jih peulisi
Bi peuringatan deungon jelas dan lancar
Lheuh nyan jôk watèe keu bandèt beuna dipatuhi

Meunyoe ka tatimbak bandét ta ba bak dokto
Peugah bak waréh bahwa si fulan ka kutimbak
Tabi ijin teuma untuk disidék lé investigator
Peugöt laporan lheuh nyan pu seubab tatimbak

Bukon lé sayang hai polém ta kalon padé
Dijak tulô lé padé ka lam prut
Peulisi jinoe cukôp that adé
Beudé han ji ngui le sibarang kapat

Na padum boh tahapan peulisi jeut ngui sinjata
Tahap eskalasi beuna bèda ngön de-eskalasi
Meunyoe situasi ka ji-ék, geupeunan eskalasi senjata
De-eskalasi meunyoe na aman situasi

Hai polém meunyoe na peulisi lam gampông
Situasi tanyoe akan teunang ngön aman
Miseue na ureung di sandeura lé bandét blang
Peulisi harôh negosiasi ngön awak nyan

Jika na agresi fisik ngön bandét
Peulisi hambô ngön jaroe soh
Tapi jika situasi agresi alat
Peulisi cok tindakan untuk peulumpuh

Namun miseue situasi ka brutal atawa anarkis
Cok zat kimia timbak lam kawan ramèe
Nyang parah lom jika situasi agresi sinjata
Nyan ureung peukaru masyarakat jeut poh maté


Nyan keuh meunan polém ulôn calitra
Bôh kiban buet peulisi beuna atôran
Bèk tatakôt lé keu sinjata
Buet peulisi jaga HAM ngön keamanan

Jinoe lôn peugah HAM bagi kelompok rentan
Bagi ureung inöng, aneuk mit,ngön pengungsi
Tajaga ngön tahormat hak-hak awaknyan
Peureulèe cit dukôngan dari peulisi

Hak ureung inong beugöt that tajaga
Binoe tanyoe hai polém bèk tapeubudak
Beutahareukat tajunjông wibawa
Bèk tapeujra peu lom tapoh secara fisik

Meunan syit di aneuk mit agam inöng
Bèk tayu buet nyang brat-brat
Tapeujôk bak sikula ngat caröng
Beuna watèe meu’èn ngön rakan sahbat

Hak peungungsi meuikot teuma
Di awak nyan habéh takôt gisa u gampông
Konflik ngön prang hana reuda-reuda
Anggota peulisi harôh jeut keu peulindông

Beuna neuteupeu hai polém bahwa buet peulisi
Nyang hana sesuai prosedur nyan meulanggar HAM
Jeut talapor bak Komnas HAM buet salah peulisi
Masalah HAM nyan jeut tasampoe u Mahkamah Internasional

Meunan cit buet-buet peulanggaran HAM laén
Tapulang buet bak Komnas HAM
Peulisi h’ana hak bi hukôman
Mandum kasus HAM akan diproses lé Komnas HAM

Jadi hai polém ngön teungku peulisi sekalian
Masalah HAM nyan kön buet manyang-manyang
Cukôp brat hukôman bagi peulaku pelanggaran
Bôh di kuta atawa di gampông

Haba seuneulhueh lôn peugah teuntang manajemen peulisi
Na lhèe boh bagoe nyang peureulèe tapeureumeuen
Integritas, kompetensi teuma lheuh nyan produktivitas peulisi
Akhé buet ka mantaplah kualitas aparat hukôm



Tapeugah nyang phôn dilèe masalah integritas
Komandan ngön aneuk buah beuna kejujuran
Kompetensi atawa kemampuan geupeureulèe lam tugas
Tamah produktivitas keu peuköng manajemen kepolisian

Nyan ban hai polém ulôn meukisah bacut
Peulisi jinoe hana juwah lé
Bak jalan raya takalön leugat
Troh Teungku Lantas laju geuatô

Geupatroli lam gampông geuwéng gari
Di Polwan pih ceudah mamèh that rupa
Aurat meutôp meutamah tari
Meureumpok di jalan ka geuteugur sapa

Tapeugöt SIM h’ana payah jôk pèng kupi
Tabayeu lagèe nyang meutuléh
Anggota peulisi hareum cok korupsi
‘Oh tauroh pih hana lé meulah

III
KALAM PEUNUTUP

Alhamdulillah pujoe keu Allah
Seulaweut keu Nabi Rasul Ambiya
Malam ka larot mata ka payah
Jan laén teuma tasambông haba

Hai Polém ngön dumma kawôm lôn lakèe meu’ah
Ulôn seumurat golom that ahli
Nyoekeuh phôn ulôn meukisah
Pat na nyang cupa tulông perbaiki

Ulôntuan mantöng meuh’at untuk meununtôt
bak balèe tuha bak rata gurèe
Pat na silap ampôn beurayeuk that-that
Mangat glah surah ‘oh uroe dudoe

Asoe kisah nyoe lôn cok dari berbagai sumber
Bak koran bak buku ngon bak internet
Teuma ma cit nibak para trainer
Saran ngön masukan lôn harapkan sangat




Mudah-mudahan HAM ngön Polmas beu saboh jalan
Meunurôt teori nyang ka geubri bak training
Mandum anggota peulisi jibri peulatihan
Agar mudah dipraktèkkan di lapangan secara langsông

Meunyoe ka jalan Polmas lam masyarakat
Teuntèe naggroe akan tertib lagi aman
Peulisi ngön masyarakat meusatu pakat
Jaga gampông nibak kriminalitas ngön keujahatan

Aman damèe tertib lagi teuntram
Geutanyoe mangat tajalankan perekonomian
Ta-ibadah jama’ah sampoe jula malam
Karna peulisi ngön masyarakat ka saboh jalan

Peulisi nyan adalah mitra masyarakat
Jinoe nyan kön simbol belaka
Tapi ka dipraktèkkan lé peulisi di seluruh tempat
Bèk lé ragu pu lom brôk sangka

’Ohnoe keuh dilèe hikayat ka tamat
Meunyoe na umu tajumpa teuma
Bak laén watèe takisah meuh’at
Meu’ah beuraya wahé kawôm dumma