Tadukong Polisi Masyarakat

Oléh : H.M. Thalib Syarief

Pujoe keu Allah sidroe Hadharat
Haba lôn surat teuntang polisi
Baca waréh droe kawôm keurabat
Tuléh hikayat bahasa seuni

Karônya Tuhan lam kru seumangat
Sastra lôn surat kirém keu akhi
Jinoe ka teuka polisi masyarakat
Rata jeut teumpat geusosialisasi

Mangat geuturi lé bandum rakyat
Lé masyarakat bandum beu meuri
Polmas phaedah teuntèe rayék that
Ureueng beu ta’at bèk lé meujudi

Bèk lé meupoh-poh aduen ngön sahbat
Kawôm keurabat bèk lé teumaki
Geutanyoe Acèh raya martabat
Timu ngön barat kawôm Islami

Polisi masyarakat tajôk horeumat
Geutanyoe rakyat bèk na nyang beunci
Sabé lam akôi beu na tiep sa’at
Kawôm keurabat bantu beu meuri

Jinoe di daèrah deungön di pusat
Laju geukarat lé pak polisi
Udép lam aman dum masyarakat
Kawôm keurabat bèk sagai seu-i

Rata wilayah polisi masyarakat
Seubagoe rahmat wahé ya akhi
Bapak polisi keurija that brat
Polwan pih meuhat jeuet te-eu bukti

Keu ureueng ramèe geujôk seumangat
Bèk lé lam jahat gata bèe hanyi
Udép di dônya jaga martabat
Bèk teuka sipheut hana terpuji




Ureueng paléh peunjara teumpat
Sinan seupôt that h’an meu’oh sakri
Wajéb jan udép beuna ta-ingat
Bèk jalan bangsat gata ikuti

Geubri peudoman lam masyarakat
Jalan seulamat lam pujoe Rabbi
Beungöh ngön malam geubri seumangat
Keureuja cukôp brat di bapak polisi

Tajaga nanggroe dék bungong langsat
Bèk tabri cacat tanyoe gop beunci
Aman ngön damèe seunang dum rakyat
Peujiôh maksit putra ngön putri

Meunyo lam aman ka teuka rahmat
Mita hareukat haté h’an sangsi
Tajak u lampôh jak pula coklat
Ban watè meukat lindôngan Rabbi

Ureueng jak u blang sabé lam mangat
H’ana meukarat ngön muka seu’i
Acèh beu aman do’a bak hadharat
Geutanyoe rakyat wajéb syukuri

Di Indonesia kana Polisi Masyarakat
Timu ngön barat tugah ka meuri
Laju geubimbing si dumna rakyat
Phaèdah that-that teuka polisi

Wahé pak polisi saleuem horeumat
Kawôm keurabat beu neupeuduli
Bak jalan raya neubri peuingat
Aduen ngön sahbat ingat Ilahi

Neuwoe ngön neujak peunténg seulamat
Bèk karat-karat bak neu-ék gari
Ban neuba honda nyawong neuingat
Laôt ngön darat beu hati-hati

Gata lam bumoe bèk sagai jahat
Sipheut bèk jeungkat lagèe pancuri
Dalam peunjara dudoe meuteupat
Hukôman nyang brat gata gop beunci


Bandum waréh lôn sabé beu ingat
Jaga martabat ureueng Islami
Amanah yah ngön ma sabé beu neumat
Pangkai seulamat sampoe ukhrawi

Di laôt luwah jipôt angèn brat
Ureueng meupukat di binèh pasi
Tanyoe uroe nyoe ka leubèh mangat
Acèh aman that karônya Rabbi

Bapak polisi ngön masyarakat
Jaroe meusambôt bandum ka meuri
Polmas pih kana timu ngon barat
Nanggroe lam nékmat Allah ka neubri

Hak Asasi Manusia peudöng lé ligat
Lam masyarakat bèk lé meujudi
Bèk lé meurampok keurija jahat
Jaga martabat dék bungöng giri

Tajaga aneuk bèk rôh lam kaplat
Bèk lam maksit beunci that Rabbi
Dalam amalan gata seulamat
Tatém ibadat putra ngön putri

Acèh lam aman tanyoe pih mangat
Bèk lam maksit beunci that Rabbi
Dalam amalan gata seulamat
Tatém ibadat putra ngön putri

Acèh lam aman tanyoe pih mangat
Pujoe hadharat tajak u haji
Seumbahyang limöng bèk sagai teulat
Allah sayang that keu ureueng Islami

Polmas beu maju makmu dum rakyat
Udép lam rahmat mangat h’an sakri
Ban watèe ta-éh tubôhteuh mangat
Dalam seumangat tan lé pancuri

Sabé tabantu Polisi Masyarakat
Tanyoe tatobat dari but keuji
Nanggroe Acèh nyoe nanggroe keuramat
Tatém ibadah bèk sagai korupsi


Bèk lé buet jahé bandum peujabat
Amanah rakyat neujaga diri
Ureueng korupsi gadöh martabat
Dudoe meusapat dalam jeruji

Gata pih malèe lam masyarakat
Nama ka cacat ka meubèe hanyi
Wahé rakan lôn beuna neuingat
Bèk lam maksiat ka neuba gaki

Polmas di Acèh beu maju that-that
Ubak Hadharat tado’a akhi
Acèh beu damèe trôh ‘an kiamat
Laôt ngön darat bèk na lé seu-i

Bèk lé teumakôt watèe hareukat
Watèe jak meukat beu le raseuki
Tajak u lampôh tapula tomat
Tapula coklat banja meuriti

Tajak u blang padé beu le that
Karônya Hadharat wajéb syukuri
Bèk sagai na brôk deungön khianat
Bèk lé maksiat deungön korupsi

Beu maju Polmas lam masyarakat
Tacok manphaat ban lheuh tsunami
Tanyoe beu akôi aduen ngön sahbat
Acèh damèe that makmu beu meuri

Tanyoe meudo’a sabé ibadat
Nanggroe lam damèe geutanyoe mangat
Bèk lé lam maksit kawôm keurabat
Jaga martabat bèk jén teumaki

Nanggroe lam damèe geutanyoe mangat
Teunang ibadat ta pujoe Rabbi
Polmas beu maju wahé ya sahbat
Udép lam mangat mudah raseuki