Polmas Ngon Ham

Oleh: Aiptu Syahril


Assalamu’alaikum warahmahtullah
Ibu ngön ayah bandum syédara
Saleuem nyang keuphôn keu Rasulullah
Seubagoe sunnah kalam tabuka

‘Olheuh nibak nyan lôn bri peunghormatan
Keu tampôk pimpinan bapak Kapolda
Kru... seumangat keu para undangan
Handai ngön tolan nyang ka trôh teuka

Nibak uroe nyoe taseumarakkan
Ulang tahunan polisi wanita
Geunab namplôh thôn umu di gopnyan
Wahé e rakan jak tapeumulia

Wahé e ibu polisi wanita
Nyang cukôp leupah gagah beurani
Droeneuh seubagoe contoh inöng lam donya
Ibarat Laksamana Malahayati

Geunap nam plôh thôn umu di Polwan
Geujaga nanggroe geulindông bangsa
Beujeut keu contoh suri toladan
Bagi perempuan di Indonesia

Geutinggai lakoe geujak meutugah
Reu-ôh reu-ah bak geukeureja
Adak na gaji hudép pih pah-pah
Hana tom gundah ngön putôh asa

Wahé abu, bapak, seureuta ayah
Bèk that neujajah kawôm di poma
Beuna tateupeu wahé rakan meutuah
Ka kodrat Allah gata h’an sama

Polisi inöng dalam meutugah
Pakaian indah ceudah leupahna
Ulèe geutôp teu-ôt h’an leumah
Meunan amanah nibak Syaidina



Meunankeuh neupeudöng hukôm syari’at
Bèk na deuh aurat cuda dan umi
Bèk na lé laloe dalam buet seusat
Bak Tuhan sidroe taseurah diri

’Oh lheuh nibak nyan lôn lakè idhin
Bak hadirin lôn lakè saba
Lôn keuneuk calitra pada hadirin
Teuntang polisi masyarakat dan hak asasi manusia

Deungön bismillah lôn mulai kalam
Polmas deungön HAM keutampôk haba
I’tikeut beugléh haté beulapang
Bak but arogan bèk tameucuca

Polmas nyang awai ulôn neuk peuphôn
Polisi lam gampông sinan keureuja
Jaga keuamanan banda ngön dusôn
Hai panyöt tanglông tugah mulia

Di dalam polmas na sikureueng unsôi
Kemitraan phôn nyan geubôh nama
Polisi ngön masyarakat geuduek meuhimpôn
Hudép lam dusôn seutara di mana saja

Unsôi yang keudua proh masalah
Problem solving geupeugah ngön basa luwa
Geupeunab ureueng nyang alôh alah
Bèk apôh apah geumita cara

Teuma nyang keulhèe nyan filosofi
Nyang geubôh arti keuyakinan
Peuseuleuso masalah ngön haté nurani
Masyarakat ngön polisi peuji-ôh sanjôngan

Nyang keupeut personalisasi
Anggota polisi tugaih lam gampông
Wahé ayah cuda ngön umi
Neuteurimong kamoe nyoe seubagoe peulindông

Unsôi keu limöng perpolisian
Nyang geupeunan peuneugakkan hukôm
Uroe ngön malam siap....jeut keu peulayan
Nyang peunténg beu aman masyarakat udép lam gampông


Teuma nyang keu nam unsôi patroli
Jak ulèe ilie lam jeut-jeut dusôn
Masyarakat beu rap deungön polisi
Beuna jalan komunikasi sabé meusambông

Nyang keu tujôh tugah permanen
Kon buet meu’èn-meu’èn tugah di gata
Neubri tugah akan meuthôn-thôn
Masyarakat lam gampông bandum beu taturi nama

Unsôi keu lapan teumpat meutugah
Anggota Polmas punya wilayah sendiri
Deungön masyarakat meumeucahkan masalah
Beu rayék saba beu ikhlas hati

Proaktif unsôi nyang keusikureueng
Polisi geukheun jeumöt keureuja
Kadang na tutô yang leubèh kureueng
Wahé syédara peumeu’ah sigra

Nyang peudöng adat Po Teumeureuhôm
Nyang peuphôm hukôm Teungku Syiah Kuala
Nyang peudöng qanun Tuan Putro Phang
Yang atô reusam Putri Laksamana

Seuneulheuh nibak nyan lôn keuneuk peutrang
Teuntang gaséh sayang keu manusia
Manusia hudép ateuh bumoe Tuhan
Hak kebebasan di mana saja

Bapak polisi nyang tugah di gampông
Geujak peulindông masyarakat dum na
Sebagoe pengayom peuneugak hukôm
Teutap geusanjông hak asasi manusia

Na lhèe landasan keu payông hukôm
Dalam peulindông hak asasi manusia
Budaya malèe beugöt tajunjông
Bèk salah tahukôm di gop meurana

Lhèe prinsip nyan harus geupeudomani
Bagi anggota polisi silaku peuneugak hukôm
Nyang keuphôn geupeunan legalitas
Bertindak tegas sesuai ngön hukôm


Prinsip nesesitas geubôh nyang keudua
Geubri makna kekerasan meunyoe peureulèe
Berhati-hati dalam meutugaih
Bèk sampoe geuteugah geutanyoe malèe

Teuma nyang keu lhèe proporsionalitas
Saat bertindak tegas tapiké ilèe
Tapeuguna beudé kon keu jalan pintas
Tatimbak gaki beupah-pah bèk keunong ulèe

Lhèe boh prinsip nyan bu na ta pakoe
Beu tatém hiro keu masyarakat lingka
Beusama-sama tajaga nanggroe
Nyang geularang Dipo bèk takeureuja

Wahé e tubôh ingat keu nyawong
Wahé e bungong ingat keumala
’Oh maté tubôh bumoe teurimöng
Tinggai di nyawong malaikat nyang ba

Wahai pak polisi aneuk rakyat
Keunoe neupeurap u dalam gampông
Beu ikhlas haté neubantu masyarakat
Udép beu bèbas bèk na teukungkông

Kamoe rakyat sangat meuharap
Senyum mamèh bak pak polisi
Walaupun neusôk pakaian leungkap
Muka teutap reumèh berseri-seri


Kamoe meulakèe bak pak polisi
Hak asasi manusia beugöt Neulindông
Bila na salah di pihak kami
Nyang bèk neubôh ri meusinthông-sinthông

Hukôm neupeudöng ngön keuadilan
Bèk na arogan dalam keureuja
Beuikhlas haté bak peubuet keubajikan
Bèk bacut-bacut buet harap beulanja

Seubagoe insan peulindông manusia
Penjaga keuamanan rakyat lam nanggroe
Yôh mantong udép di ateuh dônya
Hak asasi manusia wajéb tapakoe

Masyarakat ngön polisi jinoe bermitra
Beusama-sama geuduek meuhimpôn
Geucuba piké keu lapangan keureuja
Ladôm geujôk padé ladôm boh jagông

Jak mita raseuki harap ceuruga
Tatuntut ileumèe tateupeu hukôm
Dengön polisi geutanyoe bermitra
Hak asasi manusia akan teulindông

Wahé syédara lôn nyang na di gampông
Nyang na di dusôn kuta ngön banda
Hudép beu saré makmu beu saban
Ngön sabé rakan bèk tameudawa

Bèk na lé paké timu ngön barat
Peudöng syari’at hukôm nyang ka na
Beu mangat asoe bandum beusèhat
Menyoe tatém ibadat h’an rôh meurana

Wahé e rakan beu na tasadari
Beu na tahargai bapak Kapolda
Geu-éh h’an teungeut geuduek h’an meukri
Bak geupiké pakri ureueng beu udep aman sentosa

Nibak sa’at nyoe ka na kebijakan
Polmas deungön HAM ateuh pundak geutanyoe
Mari tajunjông peurintah pimpinan
Nyang bèk sagai tuwo peurintah Tuhan sidroe


Di Nanggroe Takengon na gunöng gureudông
Teumpat geutrôn Teungku Malem Diwa
Di Kuta Banda ranub mamèh ôn meususôn
Dara pöt jagông di Kuta Langsa

Kepada Allah lôn mohon ampôn
Tamohon lindông dari sigala bala
Bak lôn prohaba kadang na teusinggông
Neupeumeu’ah salah lôn bapak ngön bunda