Haba Lam Gampông

Oleh : M. Ikhsan

Salam’alaikôm jaroe dua blah
Cukôp meutuah dum panitia
Ka geutém peugot saboh seuleu-ah
Geupeu-ék marwah peurayek bangsa

Pujoe ngön syukur keu sidroe Allah
Seulaweut saleum Muhammad nyang sah
Ureueng nyang surah salah ngön beuna
Rahmat geulimpah keu tanyoe dumna

Ulôn grak jaroe lôn duk deungön pah
Ulôn neuk peugah padum krèk haba
Keu hak asasi marwah meulimpah
Jaga meutuah bèk rôh dicuca

Di dalam gampông pu na masalah
Laju jak peugah Polmas siaga
Mangat geusatoh deungön geu-illah
Mandum jeut pah ban tanyoe pinta

Meunan sit meunyo na ureueng salah
Bèk cok peunayah tapoh ngön massa
Keudéh tapeujôk jak adu basah
Bak polmas nyang pah peu-adé gata

Kadang sit Dék Neng aneuk Bang Dôlah
Jicok jipisah hana meuhoka
Bèk cok tindakan peu-peu nyang disah
Bak polmas peugah jeut gopnyan mita

Di aneuk muda jaga lé dikah
Bèk rôh meuramah manok cèdara
Judi ngön ganja peuji-ôh bagah
Nyang larang Allah bèk rôh di gata

Di mak ngön ayah nyang jaga maruewah
Bèk rôh meubantah lam rumoh tangga
Kadang neumeulhö geulawa ngön glah
Teuka di ayah geutampa poma


Nyoe rôh neulangga peu nyang lôn peugah
Azeub bak Allah pasti tarasa
Sinoe lam dônya Polmas nyang papah
Akhé geu-arah dalam peunjara

‘Oh noekeuh mantong marit lôn ulah
Haba peunayah Polmas geupeuna
Saléh pih beutôi saléh pih salah
Walhamdulillah lôn tôp calitra

Bèk rhôt seumangat Polmas meutuah
Dukungan leupah bak kamoe dumna
Mangat lam nanggroe ta-udép indah
Deungön neuceugah pat-pat nyang cupa

Akhirul kalam nibak Potallah
Aman ya Allah keu Acèh raya
Ureueng peutimang Polmas nyang meugah
Neubrie ya Allah beuji-ôh bala