Kru Seumangat Polmas Lon Sayang

Oleh: Naharuddin


Allah ya Tuhan Ilahi Rabbi
Lôn keuneuk rawi saboh karangan
Beusèhat tubôh jaroe ngön gaki
Ulèe beu leupie pikéran teunang

Saleuem lôn peu-ék keudéh bak Nabi
Ngön wahyu Ilahi dônya geupeutrang
Firman Allh lam kitab suci
Iqrak nyan kunci banbandum alam

Beureukat Iqrak ayat nyang suci
Keu Pak Polisi lôn cuba peutrang
Polmas deungön HAM teuma ka geubri
HUT Polwan RI tasambôt sajan

Lôn lakèe meu’ah bapak Kapolri
Kadang silap bibi bak lôn keumarang
Kapolda Aceh saleuem ulôn bri
Jajaran polisi panitia sajan

Perpolisian masyarakat saboh strategi
Lam tuboh RI nanggroe lôn sayang
Geusingkat Polmas meunan geurasi
Beuna taturi bèk salah paham

Cara lagèe nyan cukôp meurasi
Takalon bukti di nanggroe Jeupang
Polisi Jeupang cukôp that ahli
Bak geupeugèt kri Chuzaisho Koban

Chuzaisho Koban nyan jambô polisi
Saboh organisasi di pedesaan
Masyarakat gampông dengön polisi
Sang sira campli dalam masakan

Tasambôt Polmas wahé e abi
Meunan cit umi adék ngön abang
Tasambôt jinoe polwan ngön polki
Bèk na lé beunci ngön rasa deundam



Masyarakat tamsé bungöng nyang tari
Keu Pak Polisi miseue jambangan
Bungöng nyan harôm indah han sakri
Polmas nyankeuh ie nyang jaga taman

Miseue di gampông ka na pancuri
Tanyoe ngön polisi meusajan-sajan
Beusapeue pakat ulèe ngön gaki
Kejahatan tabasmi tanyoe jeuet aman

Ganja ngön arak sajan bèk tabi
Bandum kejahatan wajéb talawan
Ureueng meucèwèk deungön meujudi
Masyarakat ngön polisi sigo trön tangan

Geutrön u gampông bapak polisi
Geujak peugét kri kemasyarakatan
Beuna neukalôn ngön neupeudôli
Peureulèe ayah umi lam kemitraan

Keurija polmas lam nanggroe RI
FKPM keu gaki tim pelaksanaan
Ketua tim nyan ureueng taturi
Kepala polisi di kecamatan

Keurija di dalam laju peumeuri
Pelayanan polisi piké beurijang
Hubungan warga ngön polwan polki
Beu-ék seurasi banbandum program

Profil masyarakat susôn beurapi
Padum peutani padum peugawai
Jender ngön umu tamong lam demografi
Usaha atawa industri ngön pengangguran

Bukon lé sayang lôn kalön nanggroe
Tsunami tampoe meugeudhum geumpa
Baréh phôn rakan nakeuh bunyi oe
Lheueh nyan hai adoe teuma bunyi a

Tujuan Polmas lôn peungah jinoe
Geupeuglah tanyoe bèk meuc’uet bala
Buet-buet nyang brôk dalam gampông droe
Polmas ngön tanyoe langsông nyang jaga


Geutrôn u gampông peuget jambô droe
Geucok geutanyoe keu ngön keurija
Peue nyang jipubuet lé aparat nanggroe
Han lé geutôp droe deungön rahsia

Dilèe meuhaba sabé keudroe-droe
Rakyat lam sagoe sang hantom beuna
Geutrön u gampông bak aneuk nanggroe
Keu hukôm nanggroe ngön HAM geujaga

Polmas RI nyang lôn peungah nyoe
Ban lahé u nanggroe thôn 2005
Polisi masyarakat ka lahé jinoe
Meusaho-saho ngön ureueng desa

Polmas keurija han lé geutôp droe
Geupeuhah jinoe bak ureueng lingka
Geuteugah buet jahat han lé sidroe-droe
Bak bandum aneuk nanggroe sajan meubuka

Keurija sama Polmas ngön tanyoe
Beudöh tadeungö wahé syédara
Meunyö lam gampông ureueng dum phangphoe
Masalah beu meuho uram ngön punca

Ka mupat uram punca ka meuho
Peugah laju keudroe kiban tarasa
Karu lam gampông nyang hana meuho
Usut hai adoe peubarô cara

Nyang that neutakôt dalam gampông droe
Bithèe beusampoe bak polmas desa
Teuma ‘ohlheueh nyan laju beumeuho
Seubab karu nyoe laju tamita

Tamita seubab bek beurangkaho
Jiôh deungön toe beuteuntèe teuma
Gasien ngön kaya di dalam nanggroe
Geukheunkeuh jinoe nyan sumber daya

Ta-atô beuget buet beu meusampoe
Peutrang hai adoe saboh reuncana
Rapat reuncana sinan gampông droe
Takalön ’oh dudoe ‘eh toh keurija


Meunan keurija Polmas ngön tanyoe
Bèk lé meucawo peuaman desa
Laporan ureueng beugèt neupakoe
Beu halôh jaroe bèk cara gasa

Meunan cit ureueng bèk na lé nyang yo
Polmas nyan jinoe jak lindông gata
Sopan ngön santôn tanyoe geuhiroe
Akai meubudoe ugoh han lé na

Polmas lam gampông meuthôn keu uroe
Hana geupakoe pinah u luwa
’Oh na khanduri sajan meusaho
Geutém peurunoe aneuk sikula

Rapat keujruen blang geutém jak deungö
Geutrön jak meugoe padé geupula
Seuneulop putôh cangkôi bak jaroe
Polmas ngön tanyoe keurija sama

Keu aneuk muda bola pi geubloe
’Oh seupôt uroe jak olahraga
Bak keudè kupi ngön jambô ronda
Meujan meusaho dalam PKK

Geujak patroli kon lé ngön moto
Hana geuhiroe Toyota Avanza
Lam lungkiek gampông bandum geugilho
Geumumat jaroe ‘oh meurumpok dua

Tanyoe ngön Polmas ka tameusaho
Hanjeuet cit keudroe hukôm tapeuna
Tacok tindakan bèk lé keudroe-droe
Na syariat nanggroe atawa jaksa

Meunan keurija polmas lam nanggroe
Wahé pang sagoe bèk lé curiga
Bèk lé tatudôh meumacam bagoe
Bandum rakyat nyoe geucok keu mitra

Udép lam gampông bèk na lé phangphoe
Bèk lé tameulho deungön syédara
Bèk lé mupaké sabè keudroe-droe
Dak jeuet beusampoe aman bahgia


Meunankeuh kisah Polmas bak lôn nyoe
Lôn sambông jinoe jilid keudua
Lôn cuba tuléh HAM dalam nanggroe
Ca-é lôn gantoe meutuka haba

II
Prang dônya dua ureueng dum maté
Sang hana yum lé umat lam dônya
Beudoh lé teuma badan PBB
Laju geupiké hak manusia

Geukheun nyan HAM tapham tapiké
Udép beusaré aman merdeka
Hak sipil ngön politik jinoe beu-adé
Siksa bèk na lé hukôm tajaga

Hak sosial ekonomi udép trôh maté
Bahthat dalam glé sikula beuna
Rumoh nyang jroh udép beusaré
Beusihat até dengön gléh jiwa

Lingkôngan pembangunan bèk sampé cré-bré
Sinan hak tapiké keu ureueng lingka
Nyang pubuet jahat tadrop laju lé
Udép ngön maté HAM beutajaga

Ureueng yang salah hukôm beu-adé
Bèk deungön beudé tahukôm manusia
‚Oh watèe tadrop ureueng nyang bakhé
Beuna tapiké saboh praduga

Goh teuntèe salah meunan geukheun lé
Diakui PBB ngön badan dônya
HAM korban kejahatan pi bèk tuwo lé
Peuyum beu-adé dum manusia

Harga diri gob bèk sampoe reulé
Bèk sampoe cré-bré martabat manusia
Drop ureueng inöng beukeunong lam até
Bèk tapeulahé narit nyang gasa

Watèe geuleudah bungöng lam kandé
Tayue laju lé bak polisi wanita
Peutamöng peunjara peutimang beu adé
Bèk meusipadé korban taséksa

Aneuk miet cut-cut nyang ban-ban lahé
Hak jih beu sampé ban ureueng tuha
Bèk tapeutakôt ureueng ngön beudé
Manusia kon bacé di dalam paya

Bèk na taséksa deungön taranté
Tadhôt han jeuet lé jih manusia
Ngön ureueng tuha bèk tapeusabé
Kama tapeucré meunyö lam penjara

Tamöng peunjara jalan nyang akhé
Aneuk miet tamsé bijèh ban tapula
Meunyö bijeh nyan layèe bak tangké
Jiwajih maté badan teusiksa

Inong ngön aneuk miet wajéb tapiké
Batén ngön lahé wajéb tajaga
Makna rentan nyan jih leumoh sabé
HAM jih hana lé keunöng inaya

Hak ureueng inöng agam nyan sabé
Jender ka lahé mandum seutara
Lam keuluarga bèk na KDRT
Trafficking bèk na lé di dalam dônya

Bah lé pi HAM nyan leupah that adé
Na jan tapeucré ngön manusia
Meunyo sabab jih udép gob reulé
HAM han peunoh lé bak manusia

Salah ngön beuna hukôm beusampé
Wewenang ka lahé bak jaroe gata
Lôn harap pegeue nyang jaga padé
Bèk rap meuhasé keubeue meudôda

Le that keubeue nyang gilhö padé
Sampoe ’an maté han meupat kira
Hukôm lagèe nyan bit that han adé
HAM ka hana lé ateueh manusia

Ngön suap korupsi nanggroe rap reulé
Buet nyan pi sabé ngön kejahatan manusia
Yum manusia bèk tapeu-èlèh lé
Sinan pi lahé HAM manusia


Pelanggaran la-én pi beu tapiké
Bangsa jipeureulé kawôm agama
Peugadoh suku ureueng bèk lahé
Jahat bukon lé nyan genosida

Meumaksa mumè meumaksa lahé
But ureueng jahé ateueh manusia
Tapoh takoh-koh jasad ka cré-bré
Jameuen ka akhé mutilasi pi ka na

Meunan hikayat sanggôp lôn rawé
Meu’ah lam até meunyö salah haba
Han salah awai salah bak akhé
Hikayat ka sampé bak ujông cerita

Bukon lé sayang bintang ateueh glé
U binèh panté meutabu cahya
Cukôpkeuh ’ehnoe ulôn meuca-é
Meu’ah lam até bèk na meudèsya