OLEH : DIWAN DIANA
Assalamu’alaikôm saleuem lôn-angkat
Timu ngön barat dusôn ngön kuta
Keupada ibu seureuta bapak
Dalam nanggroe NAD nyang that mulia
Tapujoe Allah Tuhan Hadharat
Nyang peujeuet umat langèt ngön dônya
Geupeujeuet la-ôt seuruta ngön darat
Kuasa that-that Allah Ta’ala
Allah Neupeutrön rahmat ngön nèkmat
Dalam nanggroe NAD nyang that mulia
Surat taloegram wahé e sabat
Surat bak bapak dari Kapolda
Di pak Kapolda geupeutrön surat
Keudéh bak teumpat di tingkat Pemda
Bak pak Kapolres rata jeuet teumpat
Yue karang hikayat soe na seulèra
Di pak Kapolres teurimöng surat
Geuduek mupakat ngön Binamitra
‘Oh ban ka putôh janji ngön pakat
Geukirém surat tingkat Muspika
Di Pak Kapolsek teurimöng surat
Geuduek na si-at laju geubaca
Watèe ka muphôm haba lam surat
Tukang hikayat laju geumita
Seulaweuet saleuem keu Muhammad
Pangulèe umat ban sigom dônya
‘Oh lheueh keu Nabi bandum sahabat
‘Oh nyan seulaweuet dum keu keuluareuga
Dô’a lônbaca jaroe lôn-angkat
Keupada umat tingkat ulama
Sabab ulama peumbina umat
Jalan ibadat bidang agama
Sikada ‘ohnoe pujoe seulaweuet
Kata hôreumat hana lôn lupa
Keupada ibu sireuta bapak
Lônbri hôreumat bandum beurata
Bapak Kapolda nyang that teuhôreumat
Kodam di teumpat gubernur sama
Di Propinsi dalam nanggroe NAD
Bandum peurangkat nyang that mulia
‘Oh lheueh nibak nyan nyang teuhôreumat
Keupada bapak tingkat Pemda
Bapak Kapolres nyang teuhôreumat
Kodim di teumpat bupati sama
Bandum jajaran nyang na di teumpat
Nyang lôn hôreumat nyang iseutimèwa
TNI-Polri sipil di teumpat
‘Oh nyan hôreumat keu Bina Mitra
‘Oh lheueh nibak nyan nyang teuhôreumat
Keupada bapak tingkat Muspika
Keu Pak Kapolsek nyang teuhôreumat
Koramil meuhat camat pih sama
‘Oh lheueh nibak nyan bandum peurangkat
Nyang na di teumpat tingkat Muspika
Keu Bapak Pian nyang lôn hôreumat
Nyang trôk bak teumpat Diwan Diana
‘Oh lheueh nibak nyan nyang teuhôreumat
Polmas di teumpat nyang ka dibina
Pimpinan hukôm pimpinan adat
Nyang lôn hôreumat nyang istimèwa
Sèkdèh ngön dusôn dalam nanggroe NAD
Nyang lôn hôreumat nyang istimèwa
Kawôm ayah deungön kawôm mak
Hôreumat lôn-intat mudi ngön muda
Sikada ‘ohnoe kata hôreumat
La-én lônsambat lônkarang haba
Nasib peungarang sinoe lônsurat
Untông peudéh that Diwan Diana
Ibu ngön Bapak kuta deungön glé
Bèk neuweueh até haba lôntuka
Bunoe maté a jino maté é
Lônkarang rawé nasib pujangga
Diwan Diana aneuk dalam glé
Seudéh bukön lé hana sikula
Bèk ‘an SMA deungön SMP
Sikula SD tamat pih hana
Bak thôn nam plôh jinoe lônrawé
Sikula SD Diwan Diana
Sikureueng buleuen sikula SD
Lakèe SPP guru kepala
‘Oh ban lôndeungö na pèng SPP
Ie mata jilé basah bak dada
H’an ngön peue bayeue nyan pèng SPP
Bak pucôk awé ayah neumita
Kadang na breueh bu, tan bakông gambé
Meunankeuh sabé nyang kamoe rasa
Rumoh sikula hana lônjak lé
Bayeue SPP hana beulanja
Sikureueng buleuen lônduek bak SD
Padumkeuh ahli bak lônmeurika
Padum na caröng bak jimeurawé
Aneuk dalam glé Diwan Diana
Surat taloegram Kapolda asé
Dusôn deungön glé kuta ngön banda
Bapak Kapolsek ulôn geupanggé
Surat geujôk lé dari Kapolda
Surat lônbaca laju lônpiké
Nyang wajéb rawé dua boh pakta
Peuneurapan HAM nyang phôn teurawé
Polmas boh até titék keudua
‘Oh ban ka meuho tujuan rawé
Jikheun lé até lôn-ujoe cuba
Bak Pak Kapolsek lônpeugah hasé
Lôn-ujoe rawé sipatah haba
Sikada mampu ingat ngön piké
Aneuk dalam glé Diwan Diana
Nyang h’an jitu’oh A deungön B
H’an trôk jipiké bidang neugara
Dalam nanggroe NAD TNI-Polri
Sipil lom lagi silurôh kuta
Di pat na salah bak lônmeurawé
Meu’ah Bapak e bèk neucok masa
Bak bapak juri nyang kalön hasé
Kisah ngön rawé Diwan Diana
H’an neupumeunang bèk neupeuganjé
Diwan aneuk glé bèk rôh neuceula
Ka lheueh lônpeugah awai ka hasé
Diwan dalam glé hana sikula
Lèh pat meutuka a deungön b
Meu’ah pak juri hana lônsaja
Bak thôn tujôh plôh lônba rantam
Saboh utôsan di Jakareuta
TNI-Polri sipil pih sajan
Geubeuntuk badan Binmastral geurasi nama
Sabab geubeuntôk Binmastral
Tukang peutimang dusôn ngön kuta
Beuthat pih uroe ka deungön malam
Ngön masyarakat keurija sama
Bak thôn tujôh plôh ‘ohnoe lônreuntang
Jinoe hai rakan lônkarang haba
Bapak Sutanto Kapolri yôh nyan
Geubeuntôk Badan di Polmas nama
Lhèe blah Oktober wahé e rakan
Dua ribèe limöng neuk lôncalitra
Deungön saboh keuputôsan
Kapolri yôh nyan wahé syèedara
Sukep tujôh lhèe tujôh wahé e rakan
Dua ribèe limöng ulôn calitra
Seucara reuseumi keupolisian
Masyarakat nyang bijaksana
Sikada ‘ohnoe keu keuteurangan
Meu’ah hai rakan lônsambong haba
Jinoe lôntuléh wahé e rakan
Hajat tujuan matan ngön makna
Dalam nanggroe NAD jinoe lônkarang
Sipatah kalam lônsuson haba
Polmas geubina wahé e rakan
Keu-amanan dusôn ngön kuta
Wahé dum kawôm timu ngön barat
Meu’ah rayek that buhu lôntuka
Bunoe maté a jinoe maté at
Bèk jeuet keu upat lôntuléh haba
Polmas geupeugah polisi masyarakat
Ceugah peunjahat dusôn ngön kuta
Beusama-sama ngön masyarakat
Ceugah peunjahat jinoe bèk le na
Mubangun nanggroe timu ngön barat
Polmas masyarakat beusama-sama
Peugöt hubôngan peulisi-rakyat
Timu ngön barat dusôn ngôn kuta
Geupeu-ék haba ngön masyarakat
Bèk kayém ungkap bak mèdia
Keurija sama Polmas hai sabat
Rata jeuet teumpat kuta ngön banda
Polmas geubina dalam nanggroe NAD
Bandum keulompok keurija sama
Organisasi biseunih nyang leungkap
Nyang pula coklat deungön peupaya
Adak na langgéh di baranggapat
Dalam nanggroe NAD meunyo na dawa
Geupeuseuleusoe ban laku adat
Dalam nanggroe NAD lagèe budaya
Peudöng ngön hukôm timu ngön barat
Dalam nanggroe NAD beusama-sama
Tajaga nanggroe bèk na peunjahat
Tajaga ngön HAM bèk rôh meulangga
Di bidang Polmas ‘ohnoe lônrantam
Peuneurapan HAM jinoe lônrika
Nyang tukang tuléh baréh ngön rantam
Ureueng nyang awam Diwan Diana
Jaroe lôn ateueh jeumala alam
Bak Kommas HAM meu’ah beuraya
Sabab ulôn nyoe ureueng nyang awam
Di bidang HAM h’an mupat banja
Sabab lônbaca saboh suratan
Surat taloegram dari Kapolda
Sikada mampu ingat pikéran
Di bidang HAM jinoe lônrika
Nyang geupeugah mumakna HAM
Geulakab nan Hak Azasi Manusia
Dari bak bayi dalam kandôngan
Seulama gobnyan udép di dônya
Timu utara barat seulatan
Sampé e rakan siblah teunggara
Dalam nanggroe NAD inöng ngön agam
Di bidang HAM sabé peulara
Hak Asasi sidroe insan
Bèk lé hai rakan ta-énanya
Tubôh ngön badan barang sumbangan
‘Oh lheueh nibak nyan areuta beunda
Bandum geutanyoe inöng ngön agam
Tajaga HAM beusama-sama
Sabab ka na peuneurapan HAM
Geucok tindakan soe nyang meulangga
H’an meucéh tantra ngön polisian
H’an meucéh sipil rakyat jeulata
H’an meucéh tuké ngön kareuyawan
H’an meucéh bujang atawa dara
H’an meucéh lua atawa dalam
Peuneurapan HAM kalheueh geubina
Baranggasoe nyang meulangga HAM
Inöng ngön agam geubôh peunjara
Pakriban conto meulangga HAM
Sipatah kalam lôn-ujoe rika
Umpama inöng deungön agam
Udép sibadan lam rumoh tangga
Aneuk lam kandông ka dua bulan
Geugugôkan geumita cara
Adak kön ngön pè deungön reumpahan
Meulangga HAM nyang meunan rupa
Nyankeuh guna Polmas di dalam
Kalön ngön pandang dusôn ngön kuta
Jaga teureutib ngön keu-amanan
Geujaga HAM bèk rôh meulangga
Geujaga gampông bèk keujahatan
Ngön masyarakat keureuja sama
Meunyo meuteumèe nyang keujahatan
Bak purom sidang adat budaya
Meunyo h’an putôh bak adat reusam
Ubak atasan laporan geuba
Bak Pak Kapolsek Polmas laporkan
Nyang keusalahan keunan geujak ba
FKPM nyang susôn program
Ingat hai rakan tuha ngön muda
Padum boh pakta wahé e rakan
Deungö lônrantam sipatah haba
Sinoe lôntuléh sipatah kalam
Di pat salahan meu’ah beuraya
Nyang phôn lôntuléh bidang teularang
Mabôk minoman deungön nakorba
Lém cap kamèng nyang phôn lônrantam
Keudua rakan nyang geukheun ganja
Sabu-sabu èktasi sajan
Moreuphin hai rakan nyan pih jih sama
Sijeunèh la-én barang mabukan
Cukôp geularang jinoe syèedara
Kalheueh geupasoe lam undang-undang
Di dalam program jinoe geubina
TNI-Polri sipil pih sajan
Saboh putôsan pakat ka lheueh na
Barang nyang salah bandum geularang
Peue lom hai rakan nyang salah guna
Pakiban geukheuen salah gunaan
Deungö lônrantam sipatah haba
Bak jéb ie mabôk nyan saboh jalan
‘Oh lheueh nyan rakan bak p’ieb narkoba
Conto takalön nyang jéb minoman
‘Ohtèe mabôk nyan salah keurija
Kadang meutajô bak peumbunuhan
Kadang di gobnyan rôh pubuet jina
Kadang ‘oh geujak ngön keundaraan
Mumacam-macam takalön rupa
Ladôm meu-antôk ngön tanggul jalan
Ladôm lam kubang ka rhöt ngön honda
Ladôm jigiléng ureueng ba pisang
Ladôm tabrakan bak kayèe raya
Ladôm salah cok rambu jalan
Keunöng tabrakan meuninggai dônya
Honda jiplueng paléng keuncang
Ingat pikéran hana sadar
Sabab mabôk deungön minoman
Nyan lagèe nyan buet salah guna
Peutama phôn mabôk minoman
Bak peumbunuhan nyang numbôi dua
Peue nyang sijeunèh peulanggaran
H’an meucéh sipil rakyat jeulata
Peue lom meunyo rôh meulangga HAM
Inöng ngön agam hana mubida
H’an meucéh TNI-keupulisian
H’an meucéh sipil rakyat jeulata
Barangkasoe peulanggaran
Bak phorum sidang laju geujak ba
Pakrikeuh hukôm ngön peuraturan
Geuphonih rijang u ateueh gata
Sikada ‘ohnoe sinoe lônrantam
La-én lônkarang sipatah haba
Nyang tukang tuléh baréh ngön rantam
Nama lôntuan Diwan Diana
Sikada ‘ohnoe ulôn keumarang
Paneuk ngön panyang meu’ah beuraya
Singkat that watèe di ulôntuan
Surat taloegram teulat lônbaca
Bak buleuen tujôh dua plôh seumbilan
Surat taloegram barô lônbaca
‘Oh lheueh lônbaca surat taloegram
Lônpeuduek yôh nyan di ateueh bara
Sabab di ulôn keutiadaan
Di dalam hutan mita beulanja
Awé ulôn plah keu ba u peukan
Ngön bloe asam campli ngön sira
Teulat lôntuléh deungön lônkarang
Peuneurapan HAM Polmas keudua
Uroe tanggai sa bak buleuen lapan
Barô lônkarang sipatah haba
Lônduek teumuléh dari poh lapan
Dumnoe lônkarang uroe ka sinja
Hana lé watèe bak lônkeumarang
Sabab jaduwai ‘èt tanggai lima
‘Oh lheueh lôntuléh sipatah kalam
Ubak keutikan laju ulôn ba
Keu ungkoh keutik si-at meu-utang
Sabab lôntuan hana beulanja
Jaroe u ateueh jeumala alam
Di pat salahan meu’ah beuraya
Jinoe lôntuléh akhérôn kalam
Deungön wasalam peunutôp haba
Lôntôp di sinoe lônbuka keudéh
Meusaboh baréh lônkarang haba
Bak pak Kapolda teurimöng gaséh
Bapak nyang aréh that bijaksana
Di lôn lam uteuen meuröh-röh sidéh
Surat pak tuléh bak lôn trôk teuka
Haba lam surat neuyue meureuntéh
Bak ureueng aréh bidang pujangga
Baranggasoe sinoe ngön sidéh
Nyang ék teumuléh peuet boh pakta
Peuneurapan HAM nyang saboh lapéh
Polmas teutuléh nyang numbôi dua
Keu-amanan nyang keu lhèe lapéh
Teureutib abéh nyang peuet peukara
‘Oh lheueh teukarang deungön teutuléh
Teukirém keudéh bak pak Kapolda
Peulombaan wahé e waréh
Takalön keudéh ‘oh trôk bak masa
Di dalam rangka Polwan Namplôh hai waréh
Dua ribèe lapan beureuséh wahé syèedara
Sikada ‘ohnoe lônteumèe tuléh
Daweuet pih abéh uroe ka sinja
Di pat na narit di lôn meulanggéh
Meu’ah beu-abéh peu-ampôn dèesya
Bapak ngön ibu sinoe ngön sidéh
Ahli ngön waréh syèedara lingka
Dak tan neupujoe bèk neupeujayéh
Untônglôn peudéh Diwan Diana
Ulôn tet padang angoh rangkiléh
Saleuem lôntindéh peunutôp haba
